30, జులై 2012, సోమవారం

శ్రీ కామాక్షీ అమ్మవారి సుప్రభాతం


గురుమూర్తే త్వాం నమామి కామాక్షీ
జగదవన విధౌ త్వం జాగరూకా భవాని
తవ తు జనని నిద్రామాత్మవత్ కల్పయిత్వా
ప్రతిదివసమహం త్వాం బోధయామి ప్రభాతే
త్వయి కృతమపరాధం సర్వమేతం క్షమత్వ II

యది ప్రభాతం తవ సుప్రభాతం
తదా ప్రభాతం మమ సుప్రభాతమ్
తస్మాత్ప్రభాతే తవ సుప్రభాతం
వక్ష్యామి మాతః కురు సుప్రభాతమ్ II


II గురు ధ్యానం II 

యస్యాంఘ్రిపద్మ మకరందనిషేవణాత్ త్వం
జిహ్వాం గతాసి వరదే మమ మంద బధ్ధః
యస్యాంబ నిత్యమనఘే హృదయే విభాసి
తం చంద్రశేఖర గురుం ప్రణమామి నిత్యం II 1 II

జయే జయేంద్రో గురుణా గ్రహీతో
మఠాధిపత్యే శశిశేఖరేణ
యథా గురుస్సర్వ గుణోపపన్నో
జయత్యసౌ మంగళ మాతనోతు II 2 II

శుభం దిశతు నో దేవీ కామాక్షీ సర్వమంగళా
శుభం దిశతు నో దేవీ కామకోటీ మఠేశః
శుభం దిశతు తచ్ఛిష్య సద్గురుర్నో జయేంద్రో
సర్వం మంగళమేవాస్తు మంగళాని భవన్తు నః II 3 II
II శుభం II

II శ్రీః II
కామాక్షి దేవ్యంబ తవార్ద్ర దృష్ట్యా
మూకః స్వయం మూకకవిర్యథాసీత్
తథా కురు త్వం పరమేశ జాయే
త్వత్పాదమూలే ప్రణతం దయార్ద్రే

ఉత్తిష్ఠోత్తిష్ఠ వరదే ఉత్తిష్ఠ జగదీశ్వరి
ఉత్తిష్ఠ జగదాధారే త్రైలోక్యం మంగళం కురు II 1 II

శృణోషి కచ్చిద్ ధ్వనిరుత్థితోయమ్
మృదంగభేరీ పటహానకానామ్
వేదధ్వనిం శిక్షితభూసురాణామ్
శృణోషి భద్రే కురు సుప్రభాతమ్ II 2 II

శృణోషి భద్రే నను శంఖ ఘోషమ్
వైతాలికానాం మధురం చ గానామ్
శృణోషి మాతః పికకుక్కుటానామ్
ధ్వనిం ప్రభాతే కురు సుప్రభాతమ్ II 3 II

మాతర్నిరీక్ష్య వదనం భగవాన్ శశాంకో
లజ్జాన్వితః స్వయమహో నిలయం ప్రవిష్టః
ద్రష్టుం త్వదీయ వదనం భగవాన్ దినేశో
హ్యాయాతి దేవి సదనం కురు సుప్రభాతమ్ II 4 II

పశ్యాంబ కేచిద్ ధృతపూర్ణకుమ్భాః
కేచిద్ దయార్ద్రే ధృతపుష్పమాలాః
కాచిత్ శుభాంగయో ననువాద్యహస్తాః
తిష్ఠన్తి తేషాం కురు సుప్రభాతమ్ II 5 II

భేరీమృదంగ పణవానక వాద్యహస్తాః
స్తోతుం మహేశదయితే స్తుతిపాఠకాస్త్వామ్
తిష్ఠన్తి దేవి సమయం తవ కాంక్షమాణాః
ఉత్తిష్ఠ దివ్యశయనాత్ కురు సుప్రభాతమ్ II 6 II

మాతర్నిరీక్ష్య వదనం భగవాన్ త్వదీయమ్
నైవోత్థితః శశిధియా శయితస్తవాంకే
సంబోధయాశు గిరిజే విమలం ప్రభాతమ్
జాతం మహేశదయితే కురు సుప్రభాతమ్  II 7 II

అంతశ్చరన్త్యాస్తవ భూషణానామ్
ఝల్ ఝల్ ధ్వనిం నూపురకంకణానామ్
శృత్వా ప్రభాతే తవ దర్శనార్థీ
ద్వారి స్థితోహం కురు సుప్రభాతమ్ II 8 II

వాణీపుస్తకమంబికే గిరిసుతే పద్మాని పద్మాసనా
రంభా త్వంబరడంబరం గిరిసుతా గంగా చ గంగాజలమ్
కాళీ తాలయుగం మృదంగయుగలం బృందా చ నందా తథా
నీలా నిర్మల దర్పణ ధృతవతీ తాసాం ప్రభాతం శుభమ్ II 9 II

ఉత్థాయ దేవి శయనాద్భగవాన్ పురారిః
స్నాతుం ప్రయాతి గిరిజే సురలోకనద్యామ్
నౌకో హి గన్తుమనఘే రమతే దయార్ద్రేః
ఉత్తిష్ఠ దేవి శయనాత్కురు సుప్రభాతమ్ II 10 II


పశ్యాంబ కేచిత్ఫలపుష్పహస్తాః
కేచిత్పురాణాని పఠన్తి మాతః
పఠన్తి వేదాన్ బహవస్తవారే
తేషాం జనానాం కురు సుప్రభాతమ్ II 11 II

లావణ్య శేవధిమవేక్ష్య చిరం త్వదీయమ్
కన్దర్పదర్పదలనోపి వశం గతస్తే
కామారిచుంబిత కపోలయుగం త్వదీయం
ద్రష్టుం స్థితాః వయమయే కురు సుప్రభాతమ్ II 12 II

గాంగేయతోయమమవాహ్య మునీశ్వరాస్త్వాం
గంగాజలైః స్నయితుం బహవో ఘటాంశ్చ
ధృత్వా శిరఃసు భవతీమభికాంక్షమాణాః
ద్వారి స్థితా హి వరదే కురు సుప్రభాతమ్ II 13 II

మందారకుంద కుసుమైరపి జాతిపుష్పైః
మాలాకృతా విరచితాని మనోహరాణి
మాల్యాని దివ్యపదయోరపి దాతుబంబ
తిష్ఠంతి దేవి మునయః కురు సుప్రభాతమ్ II 14 II

కాంచీకలాప పరిరంభనితంబబింబామ్
కాశ్మీర చందన విలేపిత కంఠదేశమ్
కామేశ చుంబిత కపోలముదారనాసాం
ద్రష్టుం స్థితాః వయమయే కురు సుప్రభాతమ్ II 15 II

మందస్మితం విమలచారు విశాలనేత్రమ్
కంఠస్థలం కమలకోమల గర్భగౌరమ్
చక్రాంకితం చ యుగలం పదయోర్మృగాక్షి
ద్రష్టుం స్థితాః వయమయే కురు సుప్రభాతమ్ II 16 II

మందస్మితం త్రిపురనాశకరం పురారేః
కామేశ్వర ప్రణయకోపహరం స్మితం తే
మందస్మితం విపులహాసమవేక్షితుం
తే మాతః స్థితాః వయమయే కురు సుప్రభాతమ్  II 17 II
మాతా శిశూనాం పరిరక్షణార్థమ్
న చైవ నిద్రావశమేతి లోకే
మాతా త్రయాణాం జగతాం గతిస్త్వమ్
సదా వినిద్రా కురు సుప్రభాతమ్ II 18 II

మాతర్మురారికమలాసన వందితాంఘ్యాః
హృద్యాని దివ్యమధురాణి మనోహరాణి
శ్రోతుం తవాంబ వచనాని శుభప్రదాని
ద్వారి స్థితా వయమయే కురు సుప్రభాతమ్ II 19 II

దిగంబరో బ్రహ్మకపాలపాణిః  
వికీర్ణకేశః ఫణివేష్టితాంగః
తథాపి మాతస్తవ దేవిసంగాత్
మహేశ్వరోభూత్ కురు సుప్రభాతమ్ II 20 II

అయి తు జనని దత్తస్తన్యపానేన దేవి
ద్రవిడ శిశురభూద్వై జ్ఞానసంపన్నమూర్తిః
ద్రవిడతనయ భుక్తక్షీరశేషం భవాని
వితరసి యది మాతః సుప్రభాతం భవేన్మే II 21 II

జనని తవ కుమారః స్తన్యపానప్రభావాత్
శిశురపి తవ భర్తుః కర్ణమూలే భవాని
ప్రణవపదవిశేషం బోధయామాస దేవి
యది మయి చ కృపా తే సుప్రభాతం భవేన్మే II 22 II

త్వం విశ్వనాథస్య విశాలనేత్రా
హాలస్యనాథస్య ను మీననేత్రా
ఏకామ్రనాథస్య ను కామనేత్రా
కామేశజాయే కురు సుప్రభాతమ్ II 23 II

శ్రీచంద్రశేఖర గురుర్భగవాన్ శరణ్యే
త్వత్పాదభక్తిభరితః ఫలపుష్పపాణిః
ఏకామ్రనాథదయితే తవ దర్శనార్థీ
తిష్ఠత్యయం యతివరో మమ సుప్రభాతమ్ II 24 II

ఏకామ్రనాథదయితే నను కామపీఠే
సంపూజితాసి వరదే గురుశంకరేణ
శ్రీశంకరాది గురువర్య సమర్చితాంఘ్రిమ్
ద్రష్టుం స్థితా వయమయే కురు సుప్రభాతమ్ II 25 II

దురితశమనదక్షౌ మృత్యుసన్తాసదక్షౌ
చరణముపగతానాం ముక్తిదౌ జ్ఞానదౌ తౌ
అభయవరదహస్తౌ ద్రష్టుమంబ స్థితోహం
త్రిపురదలనజాయే సుప్రభాతం మమార్యే II 26 II

మాతస్తదీయ చరణం హరిపద్మజాద్యౌః
వంద్యం రథాంగసరసీరుహ శంఖ చిహ్నమ్
ద్రష్టుం చ యోగిజన మానస రాజహంసం
ద్వారి స్థితోస్మి వరదే కురు సుప్రభాతమ్  II 27 II

పశ్యన్తు కేచిద్వదనం త్వదీయం
స్తువన్తు కళ్యాణ గుణాం స్తవాన్యే
నమంతు పాదాబ్జ యుగం త్వదీయాః
ద్వారి స్థితానాం కురు సుప్రభాతమ్ II 28 II

కేచిత్సుమేరోః శిఖరేతితుంగే
కేచిన్మణిద్వీపవరే విశాలే
పశ్యన్తు కేచిత్వమృదాబ్ధిమధ్యే
పశ్యామ్యహం త్వామిహ సుప్రభాతమ్ II 29 II

శంభోర్వామాంకసంస్థాం శశినిభవదనాం నీలపద్మాయతాక్షీం
శ్యామాంగాం చారుహాసాం నిబిడతరుకుచాం పక్వబింబాధరోష్ఠీమ్
కామాక్షీ కామదాత్రీం కుటిలకచభరాం భూషణైర్భూషితాంగీం
పశ్యామః సుప్రభాతే ప్రణతజనిమతామద్య నః సుప్రభాతమ్ II 30 II

కామప్రదా కల్పతరుర్విభాసి
నాన్యా గతిర్మే నను చాతకోహమ్
వర్షస్యమోఘః కనకాంబుధారాః
కాశ్చితు ధారాః మయి కల్పయాశు II 31 II

త్రిలోచనప్రియాం వందే వందే త్రిపురసుందరీమ్
త్రిలోకనాయికాం వందే సుప్రభాతం మమాంబికే II 32 II

II ఫలశృతి II 
కామాక్షి దేవ్యం తవార్ద్రదృష్ట్యా
కృతం మయేదం ఖలు సుప్రభాతమ్
సద్యః ఫలం మే సుఖమంబ లబ్ధం
తథా చ మే దుఃఖదశా గతా హి II 33 II

ఏ వా ప్రభాతే పురస్తవార్యే
పఠన్తి భక్త్యా నను సుప్రభాతమ్
శృణ్వన్తి యే వా త్వయి బధ్ధచిత్తాః
తేషాం ప్రభాతం కురు సుప్రభాతమ్ II 34 II

II ఇతి లక్ష్మీకాంతశర్మా విరచితం శ్రీ కామాక్షీ సుప్రభాతమ్ సమాప్తం II 



 సర్వం శ్రీ వల్లీ దేవసేనా సమేత శ్రీ సుబ్రహ్మణ్యేశ్వరార్పణమస్తు